Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. quos fera circumfert, compleri sulphure muros.
  2. nec iusso mora. collectis fumantia lucent
  3. terga elephantorum flammis, raptusque sonoro
  4. ignis edax uento per propugnacula fertur.
  5. non aliter, Pindo Rhodopeue incendia pastor
  6. cum iacit, et siluis spatiatur feruida pestis,
  7. frondosi ignescunt scopuli, subitoque per alta
  8. conlucet iuga dissultans Vulcanius ardor.
  9. it fera candenti torrente bitumine corpus
  10. amens et laxo diducit limite turmas.
  11. nec cuiquam uirtus propiora capessere bella:
  12. longinquis audent iaculis et harundinis ictu.
  13. uritur impatiens et magni corporis aestu
  14. huc atque huc iactas accendit belua flammas,
  15. donec uicini tandem se fluminis undis
  16. praecipitem dedit et tenui decepta liquore
  17. stagnantis per plana uadi tulit incita longis
  18. extantem ripis flammam. tum denique sese
  19. gurgitis immersit molem capiente profundo.
  20. At qua pugna datur, necdum Maurusia pestis