Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. amisere ictus spatium, nec morte peracta
  2. artatis cecidisse licet. galea horrida flictu
  3. aduersae ardescit galeae, clipeusque fatiscit
  4. impulsu clipei, atque ensis contunditur ense.
  5. pes pede, uirque uiro teritur, tellusque uideri
  6. sanguine operta nequit, caelumque et sidera pendens
  7. abstulit ingestis nox densa sub aethere telis.
  8. quis astare loco dederat Fortuna secundo,
  9. contorum longo et procerae cuspidis ictu,
  10. ceu primas agitent acies, certamina miscent.
  11. at, quos deinde tenet retrorsum inglorius ordo,
  12. missilibus certant pugnas aequare priorum.
  13. ultra clamor agit bellum, milesque cupiti
  14. Martis inops saeuis impellit uocibus hostem.
  15. non ullum defit teli genus. hi sude pugnas,
  16. hi pinu flagrante cient, hi pondere pili,
  17. at saxis fundaque alius iaculoque uolucri.
  18. interdum stridens per nubila fertur harundo,
  19. interdumque ipsis metuenda phalarica muris.
  20. Speramusne, deae, quarum mihi sacra coluntur,