Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ‘Nate dea, solus regni lucisque fuisti
  2. germanae tu causa meae: mors testis et ille
  3. (heu cur non idem mihi tum!) rogus. ora uidere
  4. postquam est ereptum miserae tua, litore sedit
  5. interdum, stetit interdum, uentosque secuta
  6. infelix oculis magno clamore uocabat
  7. Aenean comitemque tuae se imponere solam
  8. orabat paterere rati. mox turbida anhelum
  9. rettulit in thalamos cursum subitoque tremore
  10. substitit et sacrum timuit tetigisse cubile.
  11. inde amens nunc sideream fulgentis Iuli
  12. effigiem fouet amplexu, nunc tota repente
  13. ad uultus conuersa tuos, ab imagine pendet
  14. conqueriturque tibi et sperat responsa remitti.
  15. non umquam spem ponit amor: iam tecta domumque
  16. deserit et rursus portus furibunda reuisit,
  17. si qui te referant conuerso flamine uenti.
  18. ad magicas etiam fallax atque improba gentis
  19. Massylae leuitas descendere compulit artes.
  20. heu sacri uatum errores! dum numina noctis