Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. parebat legio audaci permissa Cethego,
  2. cui socias uires atque indiscreta maniplis
  3. arma recensebant: nunc sese ostendere miles
  4. Leucosiae e scopulis, nunc, quem Picentia Paesto
  5. misit et exhaustae mox Poeno Marte Cerillae,
  6. nunc Silarus quos nutrit aquis, quo gurgite tradunt
  7. duritiem lapidum mersis inolescere ramis.
  8. ille et pugnacis laudauit tela Salerni
  9. falcatos ensis, et, quae Buxentia pubes
  10. aptabat dextris, inrasae robora clauae.
  11. ipse, umero exertus gentili more parentum,
  12. difficili gaudebat equo roburque iuuentae
  13. flexi cornipedis duro exercebat in ore.
  14. Vos etiam accisae desolataeque uirorum,
  15. Eridani gentes, nullo attendente deorum
  16. uotis tunc uestris casura ruistis in arma.
  17. certauit Mutinae quassata Placentia bello,
  18. Mantua mittenda certauit pube Cremonae,
  19. Mantua, Musarum domus atque ad sidera cantu
  20. euecta Aonio et Smyrnaeis aemula plectris.