Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ante acies uirtutis erant. saepe alite planta
  2. ilia perfossum et campi per aperta uolantem
  3. ipse pedes praeuertit ecum, saepe arduus idem
  4. castrorum spatium et saxo tramisit et hasta.
  5. Martia frons facilesque comae nec pone retroque
  6. caesaries breuior. flagrabant lumina miti
  7. aspectu, gratusque inerat uisentibus horror.
  8. Adfuit et Samnis, nondum uergente fauore
  9. ad Poenos, sed nec ueteri purgatus ab ira:
  10. qui Batulum Nucrasque metunt, Bouiania quique
  11. exagitant lustra aut Caudinis faucibus haerent,
  12. et quos aut Rufrae, quos aut Aesernia, quosue
  13. obscura incultis Herdonia misit ab agris.
  14. Bruttius, haud dispar animorum, unaque iuuentus
  15. Lucanis excita iugis Hirpinaque pubes
  16. horrebat telis et tergo hirsuta ferarum.
  17. hos uenatus alit: lustra incoluere sitimque
  18. auertunt fluuio, somnique labore parantur.
  19. Additur his Calaber Sallentinaeque cohortes
  20. necnon Brundisium, quo desinit Itala tellus.