Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nec minus Herminium primis obtruncat in armis,
  2. adsuetum, Trasimenne, tuos praedantibus hamis
  3. exhaurire lacus patriaeque alimenta senectae
  4. ducere suspenso per stagna iacentia lino.
  5. interea exanimem maesti super arma Sychaeum
  6. portabant Poeni corpusque in castra ferebant.
  7. quos ubi conspexit tristi clamore ruentis
  8. ductor, praesago percussus pectora luctu,
  9. Quinam inquit ‘dolor, o socii, quemue ira deorum
  10. eripuit nobis? num te, dulcedine laudis
  11. flagrantem et nimio primi Mauortis amore
  12. atra, Sychaee, dies properato funere carpsit?’
  13. utque dato gemitu lacrimae adsensere ferentum
  14. et dictus pariter caedis maerentibus auctor,
  15. Cerno ait ‘aduerso pulchrum sub pectore uulnus
  16. cuspidis Iliacae. dignus Carthagine, dignus
  17. Hasdrubale ad manis ibis, nec te optima mater
  18. dissimilem lugebit auis, Stygiaue sub umbra
  19. degenerem cernens noster uitabit Hamilcar.
  20. at mihi Flaminius, tam maesti causa doloris,