Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. armaque, et incisae leges, opibusque superbis
  2. uis fracta, et posuit gestatas belua turris.
  3. excelsae tum saeua rates spectacula Poenis
  4. flammiferam accepere facem, subitaque procella
  5. arserunt maria, atque expauit lumina Nereus.
  6. Mansuri compos decoris per saecula rector,
  7. deuictae referens primus cognomina terrae,
  8. securus sceptri, repetit per caerula Romam
  9. et patria inuehitur sublimi tecta triumpho.
  10. ante Syphax feretro residens captiua premebat
  11. lumina, et auratae seruabant colla catenae,
  12. hic Hannon clarique genus Phoenissa iuuenta
  13. et Macetum primi atque incocti corpora Mauri,
  14. tum Nomades notusque sacro, cum lustrat harenas,
  15. Hammoni Garamas et semper naufraga Syrtis.
  16. mox uictas tendens Carthago ad sidera palmas
  17. ibat et effigies orae iam lenis Hiberae,
  18. terrarum finis Gades ac laudibus olim
  19. terminus Herculeis Calpe Baetesque lauare
  20. solis equos dulci consuetus fluminis unda,