Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. soluere ad effatus, signum pugnamque petebant.
  2. Haec procul aeria speculantem nube sororem
  3. ut uidit diuum genitor maestosque sub acri
  4. obtutu uultus, sic ore effatus amico est:
  5. ‘Qui te mentis edunt morsus? da noscere coniunx.
  6. num Poeni casus ducis et Carthaginis angit
  7. cura tuae? sed enim reputa tecum ipsa furores
  8. Sidonios. gentem contra et fatalia regna
  9. Teucrorum quis erit, quaeso, germana, rebelli
  10. fractis foederibus populo modus? ipsa malorum
  11. non plus Carthago tulit exhausitque laboris,
  12. quam pro Cadmea subiisti exercita gente.
  13. turbasti maria ac terras iuuenemque ferocem
  14. immisti Latio. tremuerunt moenia Romae,
  15. perque bis octonos primus fuit Hannibal annos
  16. humani generis. tempus componere gentes.
  17. ad finem uentum, et claudenda est ianua belli.’
  18. Tum supplex Iuno: ‘Neque ego, haec mutare laborans
  19. quis est fixa dies, pendenti nube resedi,
  20. nec reuocare acies bellumue extendere quaero.