Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- nam, qua curuatas sinuosis flexibus amnis
- obliquat ripas refluoque per aspera lapsu
- in sese redit, hac, casso ducente labore,
- exiguum inuoluunt frustratis gressibus orbem,
- inque errore uiae tenebrarum munus ademptum.
- Lux urget panditque fugam. ruit acer apertis
- turbo equitum portis, atque omnis ferrea late
- tempestas operit campos. nondum arma manusque
- permixtae: iam tela bibunt praemissa cruorem.
- hinc iussae Poenum fugientem sistere pennae
- Dictaeae uolitant, hinc lancea turbine nigro
- fert letum cuicumque uiro, quem prenderit ictus.
- deponunt abitus curam trepidique coactas
- constituunt acies et spes ad proelia uertunt.
- Ipse inter medios (nam rerum dura uidebat)
- Sidonius ductor, tergo sublimis ab alto
- quadrupedantis equi, tendens uocemque manusque:
- ‘Per decora, extremo uobis quaesita sub axe,
- per fratris laudes oro, uenisse probemus
- germanum Hannibalis. Latio Fortuna laborat