Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. signaque ferre deum templis iam iamque fuisset,
  2. ni subito importuna lues inimicaque pestis,
  3. inuidia diuum pelagique labore parata,
  4. polluto miseris rapuisset gaudia caelo.
  5. criniger aestiferis Titan feruoribus auras
  6. et patulam Cyanen lateque palustribus undis
  7. stagnantem Stygio Cocyti oppleuit odore
  8. temporaque autumni laetis florentia donis
  9. foedauit rapidoque accendit fulminis igni.
  10. fumabat crassus nebulis caliginis aer,
  11. squalebat tellus uitiato feruida dorso
  12. nec uictum dabat aut ullas languentibus umbras,
  13. atque ater picea uapor expirabat in aethra.
  14. uim primi sensere canes. mox nubibus atris
  15. fluxit deficiens penna labente uolucris.
  16. inde ferae siluis sterni. tum serpere labes
  17. Tartarea atque haustis populari castra maniplis.
  18. arebat lingua, et gelidus per uiscera sudor
  19. corpore manabat tremulo. descendere fauces
  20. abnuerant siccae iussorum alimenta ciborum.