Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nunc meritum saeua Brutum immortale securi
  2. nomen, nunc superos aequantem laude Camillum,
  3. nunc auro Curium non umquam cernit amicum.
  4. ora Sibylla docet uenientum et nomina pandit.
  5. hic fraudes pacis Pyrrhumque a limine portae
  6. reiecit uisus orbus, tulit ille ruentem
  7. Thybridis in ripas regem solusque reuulso
  8. pone ferox ponte exclusit redeuntia regna.
  9. ‘Si tibi dulce uirum, primo qui foedera bello
  10. Phoenicum pepigit, uidisse: hic inclitus ille
  11. aequoreis uictor cum classe Lutatius armis.
  12. si studium et saeuam cognoscere Hamilcaris umbram,
  13. ille est (cerne procul) cui frons nec morte remissa
  14. irarum seruat rabiem. si iungere cordi est
  15. conloquium, sine gustato det sanguine uocem.’
  16. atque ubi permissum et sitiens se impleuit imago,
  17. sic prior increpitat non mitis Scipio uultu:
  18. ‘Taliane, o fraudum genitor, sunt foedera uobis,
  19. aut haec Sicania pepigisti captus in ora?
  20. bella tuus toto natus contra omnia pacta