Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. implebat quamquam languentia lumina somnus,
  2. uidi, crede, Iouem. nec me mutata fefellit
  3. forma dei, quod squalentem conuersus in anguem
  4. ingenti traxit curuata uolumina gyro.
  5. sed mihi post partum non ultra ducere uitam
  6. concessum. heu, quantum gemui, quod spiritus ante
  7. haec tibi quam noscenda darem discessit in auras!’
  8. his alacer colla amplexu materna petebat,
  9. umbraque ter frustra per inane petita fefellit.
  10. Succedunt simulacra uirum concordia, patris
  11. unanimique simul patrui. ruit ipse per umbram
  12. oscula uana petens iuuenis fumoque uolucri
  13. et nebulis similes animas adprendere certat.
  14. ‘Quis te, care pater, quo stabant Itala regna
  15. exosus Latium deus abstulit? hei mihi! nam cur
  16. ulla fuere adeo quibus a te saeuus abessem
  17. momenta? opposito mutassem pectore mortem.
  18. quantos funeribus uestris gens Itala passim
  19. dat gemitus! tumulus uobis censente senatu
  20. Mauortis geminus surgit per gramina campo.’