Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Fuluius, ut finem spoliandis aedibus aere
  2. belligero reuocante dedit, sublimis ab alto
  3. suggestu, magnis fautor non futtilis ausis,
  4. Lanuuio generate, inquit ‘quem Sospita Iuno
  5. dat nobis, Milo, Gradiui cape uictor honorem,
  6. tempora murali cinctus turrita corona.’
  7. tum sontes procerum meritosque piacula prima
  8. acciet et iusta punit commissa securi.
  9. †hic atrox uirtus (nec enim occuluisse probarim
  10. spectatum uel in hoste decus) clamore feroci
  11. Taurea Tune inquit ‘ferro spoliabis inultus
  12. te maiorem anima, et iusso lictore recisa
  13. ignauos cadet ante pedes fortissima ceruix?
  14. haud umquam hoc uobis dederit deus.’ inde minaci
  15. obtutu toruum contra et furiale renidens
  16. bellatorem alacer per pectora transigit ensem.
  17. cui ductor: ‘Patriam moriens comitare cadentem.
  18. qui nobis animus, quae dextera cuique uiritim,
  19. decernet Mauors. tibi, si rebare pudendum
  20. iussa pati, licuit pugnanti occumbere letum.’