Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. obtendensque manum solem inferuescere fronti
  2. arcet et umbrato perlustrat pascua uisu.
  3. hic, postquam mandata dei perfecta malamque
  4. sedauit rabiem et permulsit corda furentum,
  5. Arcadiae uolucris saltus et amata reuisit
  6. Maenala, ubi argutis longe de uertice sacro
  7. dulce sonans calamis ducit stabula omnia cantu.
  8. At legio Ausonidum, flammas ductore iubente
  9. arceri portis stantisque relinquere muros
  10. (mite decus mentis), condunt ensesque facesque.
  11. multa deum templis domibusque nitentibus auro
  12. egeritur praeda et uictus alimenta superbi,
  13. quisque bonis periere, uirum de corpore uestes
  14. femineae mensaeque alia tellure petitae
  15. poculaque Eoa luxum inritantia gemma.
  16. nec modus argento, caelataque pondera facti
  17. tantum epulis auri, tum passim corpora longo
  18. ordine captiua, et domibus deprompta talenta,
  19. pascere longincum non deficientia bellum,
  20. immensique greges famulae ad conuiuia turbae.