Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- atque ultro blanda attactu gaudebat erili.
- aurato matres adsuetae pectine mitem
- comere et umenti fluuio reuocare colorem.
- numen erat iam cerua loci, famulamque Dianae
- credebant, ac tura deum de more dabantur.
- haec aeui uitaeque tenax felixque senectam
- mille indefessos uiridem duxisse per annos
- saeclorum numero Troianis condita tecta
- aequabat. sed iam longo nox uenerat aeuo.
- nam, subito incursu saeuorum agitata luporum
- qui noctis tenebris urbem (miserabile bello
- prodigium) intrarant, primos ad luminis ortus
- extulerat sese portis pauidaque petebat
- consternata fuga positos ad moenia campos.
- exceptam laeto iuuenum certamine ductor
- mactat, diua, tibi (tibi enim haec gratissima sacra)
- Fuluius atque Adsis, orat Latonia, coeptis.
- inde alacer fidensque dea circumdata clausis
- arma mouet, quaque obliquo curuantur in orbem
- moenia flexa sinu, spissa uallata corona