Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Addunt spem miseris dulcem Parnasia Cirrha
  2. portantes responsa uiri. nam laeta ferebant
  3. exaudisse adytis, sacra cum uoce tonaret
  4. antrum et mugiret Phoebo iam intrata sacerdos:
  5. ‘Soluite, gens Veneris, grauioris corde timores:
  6. aduersa et quicquid duri sub Marte manebat
  7. exhaustum est uobis. restant leuiora laborum
  8. et sine pernicie terror. dis uota precesque
  9. ferte modo et tepidos aris libate cruores,
  10. neu date terga malis. aderit Gradiuus, et ipse
  11. Delius auertet propiora pericula uates
  12. Troianos notus semper minuisse labores.
  13. sed uero, sed enim ante omnis altaria fument
  14. centum festa Ioui: centum cadat hostia cultris.
  15. ille trucem belli nubem saeuasque procellas
  16. in Libyam uiolentus aget: spectabitis ipsi
  17. aegida turbato quatientem in proelia mundo.’
  18. atque ea Parnasi postquam clamata sub antris
  19. adlatum, uulgique deus peruenit ad auris,
  20. in Capitolinas certatim scanditur arces,