Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. maior quam ferret cum uictor opima Tonanti.
  2. Inde furens, postquam uallo uix depulit hostem,
  3. ductor Agenoreus ‘Quando hanc quantoque cruore
  4. hostili labem eluerim? mea terga uidere
  5. contigit Ausoniae? mene,’ inquit ‘summe deorum,
  6. post Trebiam statuis tam turpi funere dignum?
  7. uosque, inuicta diu, nunc heu sine Marte iuuentus,
  8. debellata bonis Capuae, non degener ipse
  9. gestorum Ausoniis uerti uictricia signa:
  10. uobis terga dedi. uidi, cum ad bella uocarem,
  11. non secus atque Italo fugere a ductore pauentis.
  12. quid relicum prisci Martis tibi, qui dare terga
  13. me reuocante potes?’ fundebat talia Poenus.
  14. at Latiae sese Nolana ad moenia turmae
  15. portantes spolia insigni clamore ferebant.
  16. At consueta grauis per longum audire suorum
  17. euentus Roma et numquam recreata secundis,
  18. adlato tandem faustae certamine pugnae
  19. erigitur primoque deum se munere tollit.
  20. ante omnis pigra in Martem fugiensque laborum,