Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- et scalis spretis temptabant rumpere muros.
- insonuere tubae passim clamorque uirorum
- hinnitusque, simul litui raucoque tumultu
- cornua et in membris concussa furentibus arma.
- fertur acerba lues disiectis incita portis
- effusaeque ruunt inopino flumine turmae,
- improbus ut fractis exundat molibus amnis,
- propulsum ut Borea scopulis impingitur aequor,
- ut rupto terras inuadunt carcere uenti.
- nec torrente Libys uiso armorumque uirumque
- deiectus spe stare ualet. dux Dardanus instat
- attonito, praegressus equo, tergisque ruentum
- incumbens hasta socios nunc uoce fatigat:
- ‘Perge, age, fer gressus. dexter deus, horaque nostra est.
- hac iter ad muros Capuae,’ nunc rursus in hostem
- conuersus: ‘Sta. quo raperis? non terga tuorum,
- te, ductor Libyae, increpito: sta. campus et arma
- et Mars in manibus. dimitto e caede cohortes:
- spectemur soli. Marcellus proelia posco.’
- sic rector Latius, iuuenique inuadere pugnam