Priapeia

Priaepia

Poeta Latini minores, ed. Aemilius Baehrens, Leipzig, Teubner, 1879

  1. Cur obscena mihi pars sit sine ueste, requiris:
  2. quaere, tegat nullus cur sua tela deus.
  3. fulmen habet mundi dominus, tenet illud aperte;
  4. nec datur aequoreo fuscina tecta deo.
  5. nec Mauors illum, per quem ualet, occulit ensem,
  6. nec latet in tepido Palladis hasta sinu.
  7. num pudet auratas Phoebum portare sagittas?
  8. clamne solet pharetram ferre Diana suam?
  9. num tegit Alcides nodosae robora clauae?
  10. sub tunica uirgam num deus ales habet?
  11. quis Bacchum gracili uestem praetendere thyrso,
  12. quis te celata cum face uidit, Amor?
  13. nec mihi sit crimen, quod mentula semper aperta est:
  14. hoc mihi si telum desit, inermis ero.