Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Canes effugere cum iam non possit fiber,
  2. (Graeci loquaces quem dixerunt castorem
  3. Et indiderunt bestiae nomen dei,
  4. Illi qui iactant se verborum copia),
  5. Abripere morsu fertur testiculos sibi,
  6. Quia propter illos sentiat sese peti.
  7. Divina quod ratione fieri non negem;
  8. Venator namque simul invenit remedium,
  9. Omittit ipsum persequi et vocat canes.
  10. Hoc si praestare possent homines, ut suo
  11. Vellent carere, tuti posthac viverent;
  12. Haud quisquam insidias nudo faceret corpori.