Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Seponit moechae vestem, mundum muliebrem,
  2. Lavationem argenteam, eunuchos, glabros;
  3. Lanificae agellos, pecora, villam, operarios,
  4. Boves, iumenta et instrumentum rusticum;
  5. Potrici plenam antiquis apothecam cadis,
  6. Domum politam et delicatos hortulos.
  7. Sic destinata dare cum vellet singulis
  8. Et approbaret populus, qui illas noverat,
  9. Aesopus media subito in turba constitit:
  10. O si maneret condito sensus patri,
  11. Quam graviter ferret, quod voluntatem suam
  12. Interpretari non potuissent Attici!
  13. Rogatus deinde solvit errorem omnium:
  14. Domum et ornamenta cum venustis hortulis
  15. Et vina vetera date lanificae rusticae;
  16. Vestem, uniones, pedisequos et cetera
  17. Illi assignate vitam quae luxu trahit;
  18. Agros, buvile et pecora cum pastoribus
  19. Donate moechae. Nulla poterit perpeti,
  20. Ut moribus quid teneat alienum suis.