Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Equus sedare solitus quo fuerat sitim,
  2. Dum sese aper volutat turbavit vadum.
  3. Hinc orta lis est. Sonipes iratus fero
  4. Auxilium petiit hominis, quem dorso levans
  5. Rediit ad hostem. Iactis hunc telis eques
  6. Postquam interfecit, sic locutus traditur:
  7. Laetor tulisse auxilium me precibus tuis,
  8. Nam praedam cepi et didici quam sis utilis.
  9. Atque ita coegit frenos invitum pati.
  10. Tum maestus ille: Parvae vindictam rei
  11. Dum quaero demens, servitutem repperi.
  12. Haec iracundos admonebit fabula
  13. Impune potius laedi quam dedi alteri.