Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Vicini furis celebres vidit nuptias
  2. Aesopus et continuo narrare incipit:
  3. Uxorem quondam Sol cum vellet ducere,
  4. Clamorem ranae sustulere ad sidera.
  5. Convicio permotus quaerit Iuppiter
  6. Causam querelae. Quaedam tum stagni incola:
  7. Nunc inquit omnes unus exurit lacus
  8. Cogitque miseras arida sede emori.
  9. Quidnam futurum est, si crearit liberos?