Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Plerumque stulti risum dum captant levem,
  2. Gravi destringunt alios contumelia
  3. Et sibi nocivum concitant periculum.
  4. Asellus apro cum fuisset obvius:
  5. Salve inquit frater. Ille indignans repudiat
  6. Officium et quaerit, cur sic mentiri velit.
  7. Asinus demisso pene: Similem si negas
  8. Tibi me esse, certe simile est hoc rostro tuo.
  9. Aper, cum vellet facere generosum impetum,
  10. Repressit iram et: Facilis vindicta est mihi,
  11. Sed inquinari nolo ignavo sanguine.