Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. Missus es Euxinas quoniam, Vestalis, ad undas,
  2. ut positis reddas iura sub axe locis,
  3. aspicis en praesens, quali iaceamus in arvo,
  4. nec me testis eris falsa solere queri.
  5. accedet voci per te non irrita nostrae,
  6. Alpinis iuvenis regibus orte, fides,
  7. ipse vides certe glacie concrescere Pontum,
  8. ipse vides rigido stantia vina gelu;
  9. ipse vides, onerata ferox ut ducat Iazyx
  10. per medias Histri plaustra bubulcus aquas,
  11. aspicis et mitti sub adunco toxica ferro,
  12. et telum causas mortis habere duas.
  13. atque utinam pars haec tantum spectata fuisset,
  14. non etiam proprio cognita Marte tibi!
  15. tenditur [*](tenditis corr. Owen) ad primum per densa pericula pilum,
  16. contigit ex merito qui tibi nuper honor,
  17. sit licet hic titulus plenus [*](plenis) tibi fructibus, ingens
  18. ipsa tamen virtus ordine maior erit.
  19. non negat hoc Hister, cuius tua dextera quondam
  20. puniceam Getico sanguine fecit aquam.