Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. Invide, quid laceras Nasonis carmina rapti?
  2. non solet ingeniis summa nocere dies,
  3. famaque post cineres maior venit, et mihi nomen
  4. tum quoque, cum vivis adnumerarer, erat;
  5. cumque foret Marsus magnique Rabirius oris
  6. Iliacusque Macer sidereusque Pedo;
  7. et, qui Iunonem laesisset in Hercule, Carus,
  8. Iunonis si iam non gener ille foret,
  9. quique dedit Latio carmen regale Severus,
  10. et cum subtili Priscus uterque Numa,
  11. quique vel imparibus numeris. Montane, vel aequis
  12. sufficis, et gemino carmine nomen habes,
  13. et qui Penelopae rescribere iussit Ulixen
  14. errantem saevo per duo lustra mari,
  15. quique suam Troesmin [*](trisonem vel troadem vel troezen etc corr. Ehwald) imperfectumque dierum
  16. deseruit celeri morte Sabinus opus,
  17. ingeniique sui dictus cognomine Largus,
  18. Gallica qui Phrygium duxit in arva senem;
  19. quique canit domito Camerinus ab Hectore Troiam;
  20. quique sua nomen Phyllide Tuscus habet;