Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. Esse salutatum vult te mea littera primum
  2. a male pacatis, Attice, missa Getis.
  3. proxima subsequitur, quid agas, audire voluntas, [*](voluptas)
  4. et si, quidquid [*](si quid vel iam si quid vel nunc quicquid) agis, sit tibi cura mei.
  5. nec dubito quin sit, sed me timor ipse malorum
  6. saepe supervacuos cogit habere metus,
  7. da veniam, quaeso, nimioque ignosce timori.
  8. tranquillas etiam naufragus horret aquas.
  9. qui semel est laesus fallaci piscis ab hamo,
  10. omnibus unca cibis aera subesse putat.
  11. saepe canem longe visum fugit agna lupumque
  12. credit, et ipsa suam nescia vitat opem.
  13. membra reformidant mollem quoque saucia tactum,
  14. vanaque sollicitis incutit [*](inmutat vel incitat vel concitat corr. σ ) umbra metum.
  15. sic ego Fortunae telis confixus iniquis
  16. pectore concipio nil nisi triste meo.
  17. iam mihi fata liquet coeptos servantia cursus
  18. per sibi consuetas semper itura vias :
  19. observare deos, ne quid mihi cedat amice,
  20. verbaque Fortunae vix puto posse dari.