Ex Ponto

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. Naso Tomitanae iam non novus incola terrae
  2. hoc tibi de Getico litore mittit opus.
  3. si vacat, hospitio peregrinos. Brute, libellos
  4. excipe, dumque aliquo, quolibet abde loco. [*](loco modo)
  5. publica non audent intra [*](inter) monimenta venire,
  6. ne suus hoc illis clauserit auctor iter.
  7. a! quotiens dixi ‘certe nil turpe docetis:
  8. ite, patet castis versibus ille locus!
  9. non tamen accedunt, sed, ut aspicis ipse, latere
  10. sub Lare privato tutius esse putant,
  11. quaeris ubi hos possis nullo componere laeso?
  12. qua steterant Artes, pars vacat illa tibi.
  13. Quid [*](qui) veniant, novitate roges fortasse sub ipsa.
  14. accipe, quodcumque est, dummodo non sit amor.
  15. invenies, quamvis non est miserabilis index,
  16. non minus hoc illo triste, quod ante dedi.
  17. rebus idem, titulo differt; et epistula cui sit
  18. non occultato nomine missa docet.
  19. nec vos hoc vultis, sed nec prohibere potestis,
  20. Musaque ad invitos officiosa venit.