Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. Cum subit illius tristissima noctis imago,
  2. qua mihi supremum tempus in urbe fuit,
  3. cum repeto noctem, qua tot mihi cara reliqui,
  4. labitur ex oculis nunc quoque gutta meis.
  5. iam prope lux aderat, qua [*](qua cum) me discedere Caesar
  6. finibus extremae iusserat Ausoniae,
  7. nec spatium nec mens fuerat satis apta parandi:
  8. torpuerant longa pectora nostra mora.
  9. non mihi servorum, comites non cura legendi,
  10. non aptae profugo vestis opisve fuit.
  11. non apter stupui, quam qui Iovis ignibus ictus
  12. vivit et est vitae nescius ipse suae.
  13. ut tamen hanc animi nubem dolor ipse removit,
  14. et tandem sensus convaluere mei,
  15. adloquor extremum maestos abiturus amicos,
  16. qui modo de multis unus et alter erant,
  17. uxor amans flentem flens acrius ipsa tenebat,
  18. imbre per indignas usque cadente genas,
  19. nata procul Libycis aberat diversa sub oris,
  20. nec poterat fati certior esse mei.