Fasti
Ovid
Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.
- hic male defensus flammis et dote paterna
- Cacus Aventinam sanguine tinxit humum,
- ad propiora vocor. populum digessit ab annis
- Romulus, in partes distribuitque duas:
- haec dare consilium, pugnare paratior illa est;
- haec aetas bellum suadet, at illa gerit,
- sic statuit mensesque nota secrevit eadem:
- Iunius est iuvenum; qui fuit ante, senum.’
- dixit, et in litem studio certaminis issent,
- atque ira pietas dissimulata foret:
- venit Apollinea longas Concordia lauro
- nexa comas, placidi numen opusque ducis,
- haec ubi narravit Tatium fortemque Quirinum
- binaque cum populis regna coisse suis
- et lare communi soceros generosque receptos,
- his nomen iunctis Iunius inquit habet.
- dicta triplex causa est. at vos ignoscite, divae:
- res est arbitrio non dirimenda meo.
- ite pares a me. perierunt iudice formae
- Pergama: plus laedunt, quam iuvat una, duae. [*](1. HK . IVN. N)