Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. an magis est verum post Tulli funera plebem
  2. confusam placidi morte fuisse ducis,
  3. nec modus ullus erat, crescebat imagine luctus,
  4. donec eum positis occuluere togis?
  5. tertia causa mihi spatio maiore canenda est,
  6. nos tamen adductos intus agemus equos.
  7. Tullia coniugio sceleris mercede parato
  8. his solita est dictis extimulare virum:
  9. ‘quid iuvat esse pares, te nostrae caede sororis
  10. meque tui fratris, si pia vita placet?
  11. vivere debuerant et vir meus et tua coniunx,
  12. si nullum ausuri maius eramus opus.
  13. et caput et regnum facio dictale parentis:
  14. si vir es, i, dictas exige dotis opes.
  15. regia res scelus est. socero cape regna necato,
  16. et nostras patrio sanguine tingue manus.’
  17. talibus instinctus solio privatus in alto
  18. sederat: attonitum volgus ad arma ruit.
  19. hinc cruor et caedes, infirmaque vincitur aetas:
  20. sceptra gener socero rapta Superbus habet.