Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. exagitant et Lar et turba Diania fures:
  2. pervigilantque Lares pervigilantque canes,
  3. bina gemellorum quaerebam signa deorum
  4. viribus annosae facta caduca morae:
  5. mille Lares Geniumque ducis, qui tradidit illos,
  6. urbs habet, et vici numina trina colunt,
  7. quo feror? Augustus mensis mihi carminis huius
  8. ius habet: interea Diva canenda Bona est.
  9. est moles nativa loco, res nomina fecit:
  10. appellant Saxum; pars bona montis ea est.
  11. huic Remus institerat frustra, quo tempore fratri
  12. prima Palatinae signa dedistis aves.
  13. templa Patres illic oculos exosa viriles
  14. leniter acclini constituere iugo.
  15. dedicat haec veteris Clausorum nominis heres,
  16. virgineo nullum corpore passa virum:
  17. Livia restituit, ne non imitata maritum
  18. esset et ex omni parte secuta suum.
  19. Postera cum roseam pulsis Hyperionis astris
  20. in matutinis lampada tollet equis,