Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. quid faciat? pugnet? vincetur femina pugnans.
  2. clamet? at in dextra, qui vetet, ensis erat.
  3. effugiat? positis urgentur pectora palmis,
  4. tunc primum externa pectora tacta manu.
  5. instat amans hostis precibus pretioque minisque:
  6. nec prece nec pretio nec movet ille minis.
  7. nil agis: eripiam dixit ‘per crimina vitam:
  8. falsus adulterii testis adulter ero:
  9. interimam famulum, cum quo deprensa ferens.’
  10. succubuit famae victa puella metu.
  11. quid, victor, gaudes? haec te victoria perdet,
  12. heu quanto regnis nox stetit una tuis!
  13. iamque erat orta dies: passis sedet illa capillis,
  14. ut solet ad nati mater itura rogum,
  15. grandaevumque patrem fido cum coniuge castris
  16. evocat, et posita venit uterque mora.
  17. utque vident habitum, quae luctus causa, requirunt,
  18. cui paret exequias, quove sit icta malo?
  19. illa diu reticet pudibundaque celat amictu
  20. ora: fluunt lacrimae more perennis aquae.