Fasti

Ovid

Ovid. Ovid's Fasti. Frazer, James George, Sir, editor. Cambridge, MA; London, UK: Harvard University Press, William Heinemann, Ltd., 1931.

  1. ipse solum colui, cuius placidissima laevum
  2. radit harenosi Thybridis unda latus,
  3. hic, ubi nunc Roma est, incaedua silva virebat,
  4. tantaque res paucis pascua bubus erat.
  5. arx mea collis erat, quem volgus nomine nostro
  6. nuncupat, haec aetas Ianiculumque vocat,
  7. tunc ego regnabam, patiens cum terra deorum
  8. esset, et humanis numina mixta locis,
  9. nondum Iustitiam facinus mortale fugarat
  10. (ultima de superis illa reliquit humum),
  11. proque metu populum sine vi pudor ipse regebat;
  12. nullus erat iustis reddere iura labor,
  13. nil mihi cum bello: pacem postesque tuebar
  14. et’ clavem ostendens haec ait arma gero.
  15. presserat ora deus. tunc sic ego nostra resolvi
  16. voce mea voces eliciente dei:
  17. ‘cum tot sint Iani, cur stas sacratus in uno,
  18. hic ubi iuncta foris templa duobus habes?’
  19. ille manu mulcens propexam ad pectora barbam
  20. protinus Oebalii rettulit arma Tati,