Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. tam qui mandabat, quam cui mandata dabantur.
  2. Sed tamen usque suum vanis Telethusa maritum
  3. sollicitat precibus, ne spem sibi ponat in arto.
  4. Certa sua est Ligdo sententia. Iamque ferendo
  5. vix erat illa gravem maturo pondere ventrem,
  6. cum medio noctis spatio sub imagine somni
  7. Inachis ante torum, pompa comitata sacrorum,
  8. aut stetit aut visa est. Inerant lunaria fronti
  9. cornua cum spicis nitido flaventibus auro
  10. et regale decus. Cum qua latrator Anubis
  11. sanctaque Bubastis variusque coloribus Apis,
  12. quique premit vocem digitoque silentia suadet,
  13. sistraque erant numquamque satis quaesitus Osiris
  14. plenaque somniferis serpens peregrina venenis.
  15. Tum velut excussam somno et manifesta videntem
  16. sic adfata dea est: “Pars o Telethusa mearum,
  17. pone graves curas mandataque falle mariti.
  18. Nec dubita, cum te partu Lucina levarit,
  19. tollere quidquid erit. Dea sum auxiliaris opemque
  20. exorata fero, nec te coluisse quereris