Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. utque rapax ignis non umquam alimenta recusat
  2. innumerasque faces cremat et, quo copia maior
  3. est data, plura petit turbaque voracior ipsa est:
  4. sic epulas omnes Erysichthonis ora profani
  5. accipiunt poscuntque simul. Cibus omnis in illo
  6. causa cibi est, semperque locus fit inanis edendo.
  7. Iamque fame patrias altaque voragine ventris
  8. attenuarat opes, sed inattenuata manebat
  9. tum quoque dira fames, implacataeque vigebat
  10. flamma gulae. Tandem, demisso in viscera censu,
  11. filia restabat, non illo digna parente.
  12. Hanc quoque vendit inops. Dominum generosa recusat
  13. et vicina suas tendens super aequora palmas
  14. “eripe me domino; qui raptae praemia nobis
  15. virginitatis habes” ait. Haec Neptunus habebat.
  16. Qui prece non spreta, quamvis modo visa sequenti
  17. esset ero, formamque novat vultumque virilem
  18. induit et cultus piscem capientibus aptos.
  19. Hanc dominus spectans “o qui pendentia parvo
  20. aera cibo celas, moderator harundinis,” inquit