Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Dixit, et obliquos dum telum librat in ictus,
  2. contremuit gemitumque dedit Deoia quercus:
  3. et pariter frondes, pariter pallescere glandes
  4. coepere ac longi pallorem ducere rami.
  5. Cuius ut in trunco fecit manus impia vulnus,
  6. haud aliter fluxit discusso cortice sanguis,
  7. quam solet, ante aras ingens ubi victima taurus
  8. concidit, abrupta cruor e cervice profundi.
  9. Obstipuere omnes, aliquisque ex omnibus audet
  10. deterrere nefas saevamque inhibere bipennem.
  11. Adspicit hunc “mentis” que “piae cape praemia!” dixit
  12. Thessalus, inque virum convertit ab arbore ferrum
  13. detruncatque caput repetitaque robora caedit,
  14. redditus et medio sonus est de robore talis:
  15. “Nympha sub hoc ego sum Cereri gratissima ligno,
  16. quae tibi factorum poenas instare tuorum
  17. vaticinor moriens, nostri solacia leti.”
  18. Persequitur scelus ille suum, labefactaque tandem
  19. ictibus innumeris adductaque funibus arbor
  20. corruit et multam prostravit pondere silvam.