Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Et quota pars illi rerum periere mearum!
  2. Dira lues ira populis Iunonis iniquae
  3. incidit exosae dictas a paelice terras.
  4. Dum visum mortale malum tantaeque latebat
  5. causa nocens cladis, pugnatum est arte medendi:
  6. exitium superabat opem, quae victa iacebat.
  7. Principio caelum spissa caligine terras
  8. pressit et ignavos inclusit nubibus aestus;
  9. dumque quater iunctis explevit cornibus orbem
  10. luna, quater plenum tenuata retexuit orbem,
  11. letiferis calidi spirarunt aestibus austri.
  12. Constat et in fontes vitium venisse lacusque,
  13. miliaque incultos serpentum multa per agros
  14. errasse atque suis fluvios temerasse venenis.
  15. Strage canum primo volucrumque oviumque boumque,
  16. inque feris subiti deprensa potentia morbi.
  17. Concidere infelix validos miratur arator
  18. inter opus tauros medioque recumbere sulco;
  19. lanigeris gregibus balatus dantibus aegros
  20. sponte sua lanaeque cadunt et corpora tabent.