Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Interea validum posito medicamen aeno
  2. fervet et exsultat spumisque tumentibus albet.
  3. Illic Haemonia radices valle resectas
  4. seminaque floresque et sucos incoquit atros.
  5. Adicit extremo lapides oriente petitos
  6. et quas Oceani refluum mare lavit harenas,
  7. addit et exceptas luna pernocte pruinas
  8. et strigis infames ipsis cum carnibus alas
  9. inque virum soliti vultus mutare ferinos
  10. ambigui prosecta lupi; nec defuit illis
  11. squamea Cinyphii tenuis membrana chelydri
  12. vivacisque iecur cervi; quibus insuper addit
  13. ora caputque novem cornicis saecula passae.
  14. His et mille aliis postquam sine nomine rebus
  15. propositum instruxit mortali barbara maius
  16. arenti ramo iampridem mitis olivae
  17. omnia confudit summisque inmiscuit ima.
  18. Ecce vetus calido versatus stipes aeno
  19. fit viridis primo, nec longo tempore frondes
  20. induit et subito gravidis oneratur olivis.