Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. adiciuntque animos. Galea tum sumit aena
  2. vipereos dentes et aratos spargit in agros.
  3. Semina mollit humus valido praetincta veneno,
  4. et crescunt fiuntque sati nova corpora dentes.
  5. Utque hominis speciem materna sumit in alvo
  6. perque suos intus numeros componitur infans,
  7. nec nisi maturus communes exit in auras,
  8. sic ubi visceribus gravidae telluris imago
  9. effecta est hominis, feto consurgit in arvo,
  10. quodque magis mirum est, simul edita concutit arma.
  11. Quos ubi viderunt praeacutae cuspidis hastas
  12. in caput Haemonii iuvenis torquere parantes,
  13. demisere metu vultumque animumque Pelasgi.
  14. Ipsa quoque extimuit, quae tutum fecerat illum;
  15. utque peti vidit iuvenem tot ab hostibus unum,
  16. palluit et subito sine sanguine frigida sedit;
  17. neve parum valeant a se data gramina, carmen
  18. auxiliare canit secretasque advocat artes.
  19. Ille gravem medios silicem iaculatus in hostes
  20. a se depulsum Martem convertit in ipsos.