Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Ille volubilibus squamosos nexibus orbes
  2. torquet et inmensos saltu sinuatur in arcus,
  3. ac media plus parte leves erectus in auras
  4. despicit omne nemus, tantoque est corpore, quanto
  5. si totum spectes, geminas qui separat arctos.
  6. Nec mora, Phoenicas, sive illi tela parabant,
  7. sive fugam, sive ipse timor prohibebat utrumque,
  8. occupat: hos morsu, longis complexibus illos,
  9. hos necat adfiatu funesti tabe veneni.
  10. Fecerat exiguas iam sol altissimus umbras:
  11. quae mora sit sociis, miratur Agenore natus,
  12. vestigatque viros. Tegimen derepta leoni
  13. pellis erat, telum splendenti lancea ferro
  14. et iaculum, teloque animus praestantior omni.
  15. Ut nemus intravit letataque corpora vidit
  16. victoremque supra spatiosi corporis hostem
  17. tristia sanguinea lambentem vulnera lingua,
  18. “aut ultor vestrae, fidissima corpora, mortis,
  19. aut comes” inquit “ero.” Dixit, dextraque molarem
  20. sustulit et magnum magno conamine misit.