Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. vivit et exspirat modo quas acceperat auras;
  2. exemploque pari furit omnis turba, suoque
  3. Marte cadunt subiti per mutua vulnera fratres.
  4. Iamque brevis vitae spatium sortita iuventus
  5. sanguineam tepido plangebat pectore matrem,
  6. quinque superstitibus, quorum fuit unus Echion.
  7. Is sua iecit humo monitu Tritonidis arma
  8. fraternaeque fidem pacis petiitque deditque.
  9. Hos operis comites habuit Sidonius hospes,
  10. cum posuit iussam Phoebeis sortibus urbem.
  11. Iam stabant Thebae: poteras iam, Cadme, videri
  12. exsilio felix. Soceri tibi Marsque Venusque
  13. contigerant: huc adde genus de coniuge tanta,
  14. tot natos natasque et pignera cara nepotes,
  15. hos quoque iam iuvenes. Sed scilicet ultima semper
  16. exspectanda dies homini est, dicique beatus
  17. ante obitum nemo supremaque funera debet.
  18. Prima nepos inter tot res tibi, Cadme, secundas
  19. causa fuit luctus, alienaque cornua fronti
  20. addita, vosque canes satiatae sanguine erili.