Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Inmemor est demum nec frugum munere dignus,
  2. qui potuit curvi dempto modo pondere aratri
  3. ruricolam mactare suum, qui trita labore
  4. illa, quibus totiens durum renovaverat arvum,
  5. tot dederat messes, percussit colla securi.
  6. Nec satis est, quod tale nefas committitur: ipsos
  7. inscripsere deos sceleri, numenque supernum
  8. caede laboriferi credunt gaudere iuvenci.
  9. Victima labe carens et praestantissima forma
  10. (nam placuisse nocet) vittis insignis et auro
  11. sistitur ante aras auditque ignara precantem
  12. imponique suae videt inter cornua fronti,
  13. quas coluit, fruges percussaque sanguine cultros
  14. inficit in liquida praevisos forsitan unda.
  15. Protinus ereptas viventi pectore fibras
  16. inspiciunt mentesque deum scrutantur in illis:
  17. unde (fames homini vetitorum tanta ciborum!)
  18. audetis vesci, genus o mortale? Quod, oro,
  19. ne facite, et monitis animos advertite nostris!
  20. Cumque boum dabitis caesorum membra palato,