Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. Magna pedis digitos pars occupat, oraque cornu
  2. indurata rigent finemque in acumine ponunt.
  3. Hunc Lycus, hunc Idas et cum Rhexenore Nycteus,
  4. hunc miratur Abas: et dum mirantur, eandem
  5. accipiunt faciem, numerusque ex agmine maior
  6. subvolat et remos plausis circumvolat alis.
  7. Si volucrum quae sit dubiarum forma, requiris,
  8. ut non cygnorum, sic albis proxima cygnis.
  9. Vix equidem has sedes et Iapygis arida Dauni
  10. arva gener teneo minima cum parte meorum.”
  11. Hactenus Oenides. Venulus Calydonia regna
  12. Peucetiosque sinus Messapiaque arva relinquit.
  13. In quibus antra videt, quae multa nubila silva
  14. et levibus cannis manantia semicaper Pan
  15. nunc tenet, at quodam tenuerunt tempore nymphae.
  16. Apulus has illa pastor regione fugatas
  17. terruit et primo subita formidine movit,
  18. mox, ubi mens rediit et contempsere sequentem,
  19. ad numerum motis pedibus duxere choreas.
  20. Improbat has pastor, saltuque imitatus agresti