Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. membraque et humano concretam sanguine barbam.
  2. mors erat ante oculos, minimum tamen ipsa doloris:
  3. et iam prensurum, iam nunc mea viscera rebar
  4. in sua mersurum, mentique haerebat imago
  5. temporis illius, quo vidi bina meorum
  6. ter quater adfligi sociorum corpora terrae,
  7. cum super ipse iacens hirsuti more leonis
  8. visceraque et carnes cumque albis ossa medullis
  9. semianimesque artus avidam condebat in alvum.
  10. Me tremor invasit: stabam sine sanguine maestus;
  11. mandentemque videns eiectantemque cruentas
  12. ore dapes et frusta mero glomerata vomentem
  13. talia fingebam misero mihi fata parari
  14. perque dies multos latitans omnemque tremescens
  15. ad strepitum, mortemque timens cupidusque moriri,
  16. glande famem pellens et mixta frondibus herba,
  17. solus, inops, exspes, leto poenaeque relictus
  18. hanc procul adspexi longo post tempore navem
  19. oravique fugam gestu ad litusque cucurri —
  20. et movi. Graiumque ratis Troiana recepit!