Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. armaque concussit certumque equitavit in orbem
  2. verbaque tot fudit vacuas animosus in auras:
  3. “Et te, Caeni, feram? Nam tu mihi femina semper,
  4. tu mihi Caenis eris. Nec te natalis origo
  5. commonuit, mentemque subit, quo praemia facto
  6. quaque viri falsam speciem mercede parasti?
  7. Quid sis nata, vide, vel quid sis passa, columque,
  8. i, cape cum calathis et stamina pollice torque:
  9. bella relinque viris.” Iactanti talia Caeneus
  10. extentum cursu missa latus eruit hasta,
  11. qua vir equo commissus erat. Furit ille dolore
  12. nudaque Phyllei iuvenis ferit ora sarisa.
  13. Non secus haec resilit, quam tecti a culmine grando,
  14. aut siquis parvo feriat cava tympana saxo.
  15. Comminus adgreditur laterique recondere duro
  16. luctatur gladium: gladio loca pervia non sunt.
  17. “Haud tamen effugies! medio iugulaberis ense,
  18. quandoquidem mucro est hebes” inquit et in latus ensem
  19. obliquat longaque amplectitur ilia dextra.
  20. Plaga facit gemitus in corpore marmoris icti,