Epistulae

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Mittit et optat amans, quo mittitur, ire salutem
  2. Haemonis Haemonio Laodamia viro.
  3. Aulide te fama est vento retinente morari.
  4. At me cum fugeres, hic ubi ventus erat?
  5. Tum freta debuerant vestris obsistere remis;
  6. Illud erat saevis utile tempus aquis.
  7. Oscula plura viro mandataque plura dedissem;
  8. Et sunt quae volui dicere multa tibi.
  9. Raptus es hinc praeceps, et qui tua vela vocaret,
  10. Quem cuperent nautae, non ego, ventus erat;
  11. Ventus erat nautis aptus, non aptus amanti.
  12. Solvor ab amplexu, Protesilae, tuo,
  13. Linguaque mandantis verba inperfecta reliquit;
  14. Vix illud potui dicere triste 'vale!'
  15. Incubuit Boreas abreptaque vela tetendit,
  16. Iamque meus longe Protesilaus erat.
  17. Dum potui spectare virum, spectare iuvabat,
  18. Sumque tuos oculos usque secuta meis;
  19. Ut te non poteram, poteram tua vela videre,
  20. Vela diu vultus detinuere meos.