Amores
Ovid
Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.
- Ianitor — indignum! — dura religate catena,
- Difficilem moto cardine pande forem!
- Quod precor, exiguum est — aditu fac ianua parvo
- Obliquum capiat semiadaperta latus.
- Longus amor tales corpus tenuavit in usus
- Aptaque subducto pondere membra dedit.
- Ille per excubias custodum leniter ire
- Monstrat: inoffensos derigit ille pedes.
- At quondam noctem simulacraque vana timebam;
- Mirabar, tenebris quisquis iturus erat.
- Risit, ut audirem, tenera cum matre Cupido
- Et leviter 'fies tu quoque fortis' ait.
- Nec mora, venit amor — non umbras nocte volantis,
- Non timeo strictas in mea fata manus.
- Te nimium lentum timeo, tibi blandior uni;
- Tu, me quo possis perdere, fulmen habes.
- Adspice — uti videas, inmitia claustra relaxa —
- Uda sit ut lacrimis ianua facta meis!
- Certe ego, cum posita stares ad verbera veste,
- Ad dominam pro te verba tremente tuli.