Amores

Ovid

Ovid. P. Ovidius Naso, Volume 1: Amores, Epistulae, Medicamina faciei femineae, Ars amatoria, Remedia amoris. Ehwald, Rudolf; Merkel, Rudolph; editors. Leipzig: B. G. Teubner, 1907.

  1. Iusta precor: quae me nuper praedata puella est,
  2. Aut amet aut faciat, cur ego semper amem!
  3. A, nimium volui — tantum patiatur amari;
  4. Audierit nostras tot Cytherea preces!
  5. Accipe, per longos tibi qui deserviat annos;
  6. Accipe, qui pura norit amare fide!
  7. Si me non veterum commendant magna parentum
  8. Nomina, si nostri sanguinis auctor eques,
  9. Nec meus innumeris renovatur campus aratris,
  10. Temperat et sumptus parcus uterque parens —
  11. At Phoebus comitesque novem vitisque repertor
  12. Hac faciunt, et me qui tibi donat, Amor,
  13. Et nulli cessura fides, sine crimine mores
  14. Nudaque simplicitas purpureusque pudor.
  15. Non mihi mille placent, non sum desultor amoris:
  16. Tu mihi, siqua fides, cura perennis eris.
  17. Tecum, quos dederint annos mihi fila sororum,
  18. Vivere contingat teque dolente mori!
  19. Te mihi materiem felicem in carmina praebe —
  20. Provenient causa carmina digna sua.