Odes

Horace

Horace, Odes and Epodes. Shorey, Paul,editor; Laing, Gordon Jennings, joint editor. Chicago: B.H. Sanborn and Company, 1919.

  • duris ut ilex tonsa bipennibus
  • nigrae feraci frondis in Algido,
  • per damna, per caedis ab ipso
  • ducit opes animumque ferro.
  • non hydra secto corpore firmior
  • vinci dolentem crevit in Herculem
  • monstrumve submisere Colchi
  • maius Echioniaeve Thebae.
  • merses profundo, pulchrior evenit;
  • luctere, multa proruet integrum
  • cum laude victorem geretque
  • proelia coniugibus loquenda.
  • Carthagini iam non ego nuntios
  • mittam superbos: occidit, occidit
  • spes omnis et fortuna nostri
  • nominis Hasdrubale interempto.
  • nil Claudiae non perficient manus,
  • quas et benigno numine Iuppiter
  • defendit et curae sagaces
  • expediunt per acuta belli”.